Big thanks to Raniera Harrison for the translation. Follow him on Twitter

Te Rārangi Kounga (Stocks Up)

Curtis Rona – Kei te pakari anō te parirau nui o Aotearoa nei. Kotahi ōna piro, ā, he kotahi rau mā rima ngā mita omanga māna hei tāpiri atu ki ngā whatinga rutu e rua, me tētahi whāngai pōro. Kihai a Rona i whai piro i tērā wiki, heoi, nā te hautoa o te kapa Purutōke i te kapa Rāpeti – mā hea atu i taua tākaro rā hei whai wāhitanga atu mā Curtis ki te whai piro.

Chase Stanley – Kāore au i te tino hikaka mō Stanley hei topapū NRL, heoi anō, kei te ū tonu te whiriwhiri a te kaiako matua o te kapa Purutōke, a Des Hasler ki a ia. I waimarie te topapū Kiwi ō mua I tōna tino tākaro i ngā tau, ā, i pā ōna ringa ki te pōro e hia nei ngā taima, he pae iwa mita te nui o āna kawenga i te pōro. E ono katoa ōna whatinga rutu, ā, kua tutuki i a ia tētahi piro ataahua rirerire anō.

Sam Perrett – Ko Perrett ā runga, otirā te kapa Purutōke whānui tonu. Kotahi rau mā toru te mita omanga mā te parirau Māori nei, inā rā, kotahi te whāngai whakatū whai piro, e rua ngā whatinga rutu, ā, he whatinga rārangi ārai anō hei tāpiri atu ki ōna tatauranga.

Sam Kasiano – Kia hoki atu anō ki tāku i kii ai i tērā wiki, he kaitākaro pikinga nui, hekenga nui anō a Sam Kasiano. Ki te tika te tākaro a te kapa Purutōke, ka tika te tākaro a Kasiano. Ahakoa he rua tekau mā iwa mīneti tākaro noa iho ōna, he tekau ira whitu mita te pae o āna mita omanga, e rua ngā whāngaihanga pōro, ā, he whakakitenga nui i te āheinga o te poutukituki nui nō roto mai o Ōtāhūhū.

Jason Taumalolo – He iwi motuhake anō ngā poutukituki e āhei ana ki ngā mahinga nui a Taumalolo. Kāre pea ētahi e waia ana ki ngā hautoa ōna. Rua tekau mā tahi ngā mita omanga ki a ia, e rua anō ngā whatinga i te rārangi ārai. Nā te nui o ngā mahi kua pīkauhia e ia i pēnā ai. Ki te pērā rawa te nui o ngā pīkauhanga i te pōro, kāore e kore ka nui rawa ō tatauranga. Ka mutu, koia i noho taniwha mai ai a Taumalolo i te whakataetae NRL ia wiki, ia wiki. He tekau ira rima rima ōna pae mō te kawe i te pōro.

Jordan Rapana – Ia wiki, ia wiki, ka noho mai a Jordan Rapana i te rārangi “Te Rārangi Kounga”, nā tōna kaha ki te kawe i te pōro i ngā kaitākaro katoa i te papa tākaro, he nui rawa ōna mita omanga rānei te take. I tēnei wiki i te tākaro ki te kapa o Te Tai Koura, nō Rapana te tatauranga nui mō ngā kawenga pōro, mita omanga anō hoki. He kotahi rau, wha tekau mā tahi mita ōna nama mō te kawe i te pōro, tekau mā ono ngā kawenga, e toru ngā whatinga rutu. Ka mutu, nā Rapana i ārahi i te tākaro wāhanga tuarua i ōna whāngaitanga e toru. Kāore he kaitākaro kotahi i tua atu i a Rapana mō te whāngai i te pōro i tēnā tākaro.

Joseph Tapine – E whakaaro nuitia ana a Tapine e Ricky Stuart i ngā tākaro tata kua tata hipa atu nei. Kua kuhuna a ia hei kaitākaro i waenga whiira tākaro, ā, e hanga tūmeke ana i te kitenga o āna haere i tērā tūranga hou ōna. Rua tekau mā iwa mīneti tākaro noa iho ōna. Tāpiri atu ki tērā, he rima tekau mā tahi ngā mita ōmanga ki a ia i ngā kawenga e whā anake. Ko te whakapae ia, ka piki ake te nui o ngā mīneti tākaro mā Tapine i te kapa Raiders a haere ake nei.

Leivaha Pulu – Kāre pea ōna kaha i tino puta mai pēnei i a Ryan James i te pae hihiri mō te Tai Koura. Haunga anō tērā, kei te pakari tonu mai a Pulu i āna mahi, ā, he mōrearea kē tōna āhua i a ia e kawe ana i te pōro. Rima tekau mā tahi mīneti tana wāhanga i te tākaro, ā, kāore he kaitākaro poumua o te pae hihiri o te kapa Raiders i tua atu i a Pulu mō ngā mīneti tākaro.

Shaun Kenny-Dowall – Koinei pea te tākaro o te rauna nei mā SKD. He tāpara te whiwhi i te rārangi piro mōna, he rua rau mita tāna i oma ai i ngā kawenga tekau mā whitu, ka mutu, he tekau katoa ngā whatinga rutu i tutuki i a ia. Kei te taumata kē anō ōna tatauranga, ā, ka pakari haere nei tana haere whai muri i ngā raruraru i waho i te papa tākaro. Katoa katoa ēnei whika i tōna tākaro rua rau i te NRL. Tēnei te whakanui atu, SKD!

Sio Siua Taukeiaho – Ko taua āhua anō rā mō Taukeiaho. Kotahi rau, toru tekau mā whitu ngā mita omanga i hikoia e ia. Tuia ki tērā, nui atu i te kotahi rau mita te roa o tana oma i roto i ia kēmu o tēnei tau tākaro, ā, heoi anō!

Lewis Brown – He karapu hou, engari ko taua mahi tonu anō mā Brown. He whakakii i ngā āputa tākaro tāna e arumia ai. I te tākaro ki ngā Pīkaokao kua whakatūria ki te tūranga topatahi, e hoa mā, nanakia tonu anō ōna mahi. Kotahi rau rua tekau ngā mita omanga i ngā kawenga e waru. Nanakia!

Peta Hiku – Māku anō te kii – ko Hiku tētahi o ngā tino topapū i te NRL i tēnei wā tonu nei. Tārake ake nei te kitea kāore he paku aha ki a ia ki te whakawhirinaki atu ki te kapa o Penrith. He whai piro tāna i te tākaro ki ngā Tarakona, he kotahi rau ono tekau mā tahi ngā mita omanga tāna anō, ā, e whitu ngā whatinga rutu hei hoa mā tōna whāngaihanga pōro kotahi anō. Haramai Ngāti Porou!

Dallin Watene-Zelezniak – Inā rā te matekai o DWZ, ā, ka kite atu koe i te pakari o tōna taera oma, me te māngaru o tōna momo tākaro. He tāpirihanga kounga anō rā tērā mō te tamaiti o Tainui Waka. Kotahi rau, e wha tekau katoa ngā mita i omakina ai e ia, ā, nāna tonu i whati i ngā rutu e toru, kia kii ake ai tātou he tākaro pakari, he tākaro nui tāna i tutuki ai.

Jason Nightingale – Kāre pea te ingoa Nightingale me te whakaaro o te kounga o te tākaro kounga e haere ngātahi atu nei. Engari tonu, kāre he kaitākaro Tarakona kotahi i tua atu i te uri o Tainui mō te whāngai pōro i te tākaro ki te kapa Penrith. Ki te tāpiri anō koe i ngā tatauranga mō ōna whatinga rutu, me ōna mita omanga roa nei, ehara i te mahi taimaha ki te noho mataara ki ngā hautoa, me te pakari o Nightingale.

James Fisher-Harris – He karanga tōmuri tāna i rongo ai, engari i kitea mai te kaha pukumahi a te tamaiti o Te Tai Tokerau, a Fisher-Harris. He nui ōna pūkenga nui i kitea i tōna putanga mai i te pae hihiri mō te kapa Penrith. He rima tekau mā tahi mita ōna mita omanga i ngā kawenga e rima, ā, i tutuki i a ia aua tatauranga i mineti rua tekau mā whitu. E kore rawa te tangata e pōhēhē noa mai ko wai a Fisher-Harris i te whiira tākaro. Ko ia kei te oma haere anō nei he wairangi te tangata! Ka mutu hoki, nāna i whāngai i te pōro ki a Peta Hiku kia whakawhiti i a ia te rārangi piro.

Suaia Matagi – Whai muri i tōna hunukutanga ki Penrith mai i te kapa Pīkaokao. E hoa ma! Kua taiea ake anō te tākaro a Matagi mō tana kapa hou i noho pōhara i tētahi waewae parahutihuti hei kawe i te pōro. He tekau mā toru ira whitu te pae o āna omanga i ngā kawenga e ono. Nā whai anō rā he tāpirihanga pai tērā mā te kapa Panthers.

Manu Vatuvei – Ko Manu Vatuvei te makau a Niche Cache, ā, kua hoki mai hei parirau aroākapa. I kitea tōna wāriu mō te kapa Tamatoa, he kotahi rau mā whitu mita ki a ia i ngā kawenga tekau mā rua. Ā, tāpiri atu ki tērā, e rima anō ngā whatinga i ngā rutu te kai māna. Wetiweti!

Roger Tuivasa-Sheck – He kēmu rua rau mita anō mā Mr. 200! He rua rau mā toru ngā mita omanga i tutuki pai ai i a RTS, aini pea e tika ana kia mihi atu a ia ki ōna rua tekau mā tahi kawenga pōro i pērā rawa ai te nui o taua tatauranga rā. Heoi anō rā, i nui rawa ngā mahinga a Tuivasa-Sheck mā te kapa Tamatoa, ā, e toru ngā whāngaihanga poro anō hei āpiti atu ki ngā riiki whutupōro wāhanga tuarua i kitea i te kapa.

Sauaso Sue & Ava Seumanufagai – Kei a te kapa Taika o te Hauāuru ētahi tino tianara hei ārahi i ā rātou momo tākarohanga, ā, koia kei a rātou, otirā, kei a Aaron Woods e whakapaetia ana mō te tūranga matua hei poutukituki i te katoa o te NRL. Heoi anō rā, kei te aroha nui rawa atu mātou i a Sue rāua ko Seumanufagai e kaha nei i te pokapū o te whiira tākaro, me te aha, kāre i te tino nui ngā kupu whakamiha ki a rāua. He kotahi rau, wha tekau mā rua ngā mita omanga a Sue, ā, e hanga pēnā tonu ana tōna hoa tākaro a Seumanufagai. Ko rāua tahi anō rā kei te rārangi mō ngā rutu, he rima tekau katoa mō te tokorua nei. Ā, kei a rāua anō hoki ngā pūkenga hei mea aukati i te kapa Eels e āta whanake nei.

Manu Ma’u – Ahakoa kei te pūkanakana te noho hara ki a ia, i kitea mai te wāriu a Ma’u i tōna hokinga ki te whiira. Mai anō i tōna noho haranga ō mua, he kotahi rau toru tekau mā toru katoa ōna mita omanga i te katoa o te waru tekau mineti, ā, he rutu toru tekau anō māna. Ko Junior Paulo anake te kaitākaro ki te pērā rawa te nui o ngā tatauranga. E hōhā katoa ana kei te pokea tonutia a Ma’u mō āna haranga ō mua, nā whai anō, ki te kino anō te pahupahu nei – ka panaia mō te koni atu i rua wiki.

Kenny Edwards – Inā rā te pakari o te uri Māori nei, ā, kei te tāpiri atu i tōna iti ki te paeroa nui i tēnei tau tākaro. He rite anō a Edwards ki a Ma’u mō te tere o ngā waewae, ā, kei te piki ake ngā mineti mō tōna kapa e whanake nui mai nei, ā-ārai anō hoki – nā whai anō rā i noho māka kore tonu te kapa Taika.

Sosaia Feki – Kua kitea te hautoa me te māia o Feki i ōna mita omanga e kotahi rau, toru tekau mā rua, ā, ko ia anō hoki tētahi o te tokowhā o ngā poumuri o te kapa Sharks ki te hipa i te māka kotahi rau mita i te tākaro ki a Poi Piripi.

Tohu Harris – Nā te makawe roa o Te Matau a Māui te kapa o Poi Piripi i arahi i te tākaro ki a Cronulla. Ko ia kei te taumata mō ngā kawenga pōro (20), kia kotahi te whāngai pōro, ā, he rua tekau mā toru ngā rutu. I oma a Harris mō ngā omanga mita e kotahi rau, whitu tekau mā toru i te tākaro i noho mai ia hei poumua tahataha ahakoa i whakaingoatia hei topapū aroākapa. Me kii pēnei – he uri nō Tāne Wharerangi te koroke nei, poumua mai, poumuri atu!

Jesse Bromwich – Kāre i te tino pai te tākaro a te kapa Poi Piripi ki te kapa Cronulla nā te tapepe pea o te rārangi poumuri pea i pēnā ai. E aua! Engari, e mōhio katoa ana a Niche Cache, ehara nō Bromwich te hē! Kotahi rau, e whā tekau mā rima ngā mita omanga kei a ia, ā, e whā katoa ngā whāngaihanga pōro, ko te tatauranga nui rawa tērā i ngā kaitākaro katoa i te tākaro.

Te Rārangi Koretake (Stocks Down)

Jordan Kahu – He pō takerehāia nui mā Kahu. I timata mai hei topapū aroākapa, ā, whitu tekau mita noa tāna i oma ai i ngā kawenga e iwa. E iwa hoki katoa ngā rutu kihai i tutuki pai i a ia anō. Māmā noa iho te kii – koinei te tākaro kikino rawa atu a Kahu i ngā tau e rua, hoki atu, hoki atu.

Frank-Paul Nuuasuala – Heoi anō, nāna i natia te kauae o tōna ake kapa, nā te hāmene i mahia mai ai e ia. Koia katoa i wikitōria ai te kapa o Te Tai Koura i ngā wahanga whakamutunga o te tākaro. Rorokau!

Jeff Lima – I pakaru mai tōna ringa i ngā mineti tekau mā tahi o te tākaro. Ināianei, ka noho ki uta rā anō mō te kotahi marama.

Russell Packer – He tino pai tonu te tākaro a Packer, engari anō mō te hāmene pōrangi ōna mō te rutu hāmene ki runga i a Jamie Soward. E rua anō ngā hāmene, me tētahi wharanga ki tōna ingoa, ka pūmau anō pea tōna ingoa ki tēnei rārangi.

Manaia Cherrington – Kei te āta whakaaro ake he aha ia nei tērā e whakaarohia ana mō Cherrington. Nāna te pae hihiri i whakamahana mai mō Robbie Farah i te tākaro ki a Parramatta. Kei te pae hihiri tonu a Farah rāua ko Cherrington i tētahi wā poto o te tākaro, ā, ko te āhua nei e kore a Cherrington e tākaro mēnā kua ora pai a Farah. E aroha ana!